ନୂଆଦିଲ୍ଲୀ : ଶୁକ୍ରବାର ଉତ୍ତରପୂର୍ବାଞ୍ଚଳ ରାଜ୍ୟ ଅରୁଣାଚଳ ପ୍ରଦେଶରେ ହୋଇଥିବା ସେନା ହେଲିକାପ୍ଟର ଦୁର୍ଘଟଣାକୁ ନେଇ କେତେକ ନୂଆ ତଥ୍ୟ ଆସିଛି। ହେଲିକାପ୍ଚର ଦୁର୍ଘଟଣା ହେବା ପୂର୍ବରୁ ପାଇଲଟଙ୍କ ପକ୍ଷରୁ ଏୟାର ଟ୍ରାଫିକ କଣ୍ଟ୍ରୋଲରଙ୍କୁ ‘ମେ ଡେ କଲ୍’ କରାଯାଇଥିଲା। ବିମାନର ପାଇଲଟ କିମ୍ବା ଜାହାଜର ଚାଳକ ବିପଦରେ ପଡ଼ିବା ପରେ ଉଦ୍ଧାର ପାଇଁ ଏପରି ସିଗନାଲ ଦେଇଥାନ୍ତି। ଏଥିରୁ ଜଣାପଡ଼ୁଛି ଯେ ହେଲିକାପ୍ଟରରେ କିଛି ଯାନ୍ତ୍ରିକ ତ୍ରୁଟି ହୋଇଥିଲା ଓ ଆକାଶରେ ଥିବାବେଳେ ହିଁ ପାଇଲଟ୍ ତାହାକୁ ଜାଣିପାରିଥିଲେ। ତେବେ ସେନା ପକ୍ଷରୁ ଏହି ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି ଓ ଦୁର୍ଘଟଣାର ପ୍ରକୃତ ତଥ୍ୟ ତଦନ୍ତ ପରେ ଜଣାପଡ଼ିବ। ସୂଚନାଯୋଗ୍ୟ ଯେ, ଶୁକ୍ରବାର ପୂର୍ବାହ୍ନ ୧୦ଟା ୪୩ ମିନିଟ୍ ସମୟରେ ଅରୁଣାଚଳ ପ୍ରଦେଶର ଉପର ସିଆଙ୍ଗ ଜିଲ୍ଲାର ମିଗିଙ୍ଗ ଗ୍ରାମ ନିକଟସ୍ଥ ଜଙ୍ଗଲରେ ସେନାର ଏକ ଆଡଭାନ୍ସଡ୍ ଲାଇଟ୍ ହେଲିକପ୍ଟର (ଏଏଲଏଚ) ଦୁର୍ଘଟଣାଗ୍ରସ୍ତ ହୋଇଥିଲା। ଉକ୍ତ ହେଲିକପ୍ଟରରେ ପାଇଲଟଙ୍କୁ ମିଶାଇ ମୋଟ ୫ ଜଣ ସେନା କର୍ମଚାରୀ ଥିଲେ। ଦୁର୍ଘଟଣା ସ୍ଥଳ ଅତ୍ୟନ୍ତ ଦୁର୍ଗମ ଥିବାରୁ ସେଠାରେ ପହଞ୍ଚିବାକୁ ଉଦ୍ଧାରକାରୀ ଦଳ ପାଇଁ ସମସ୍ୟା ସୃଷ୍ଟି ହୋଇଥିଲା। ତେବେ ବାୟୁସେନା ଓ ସେନାର ମିଳିତ ଉଦ୍ଧାରକାରୀ ଦଳ ଅପରାହ୍ନରେ ସେଠାରେ ପହଞ୍ଚିବାକୁ ସକ୍ଷମ ହୋଇଥିଲେ ଓ ସଂଧ୍ୟାସୁଦ୍ଧା ଦୁର୍ଘଟଣାସ୍ଥଳରୁ ୫ଟି ମୃତଦେହ ଉଦ୍ଧାର କରିଥିଲେ।
ଅରୁଣାଚଳ ହେଲିକପ୍ଟର ଦୁର୍ଘଟଣା : ପାଇଲଟ୍ ଜରୁରୀକାଳୀନ ସୂଚନା ପଠାଇଥିଲେ
Share Now: